【棋間限定 - 日本桌遊介紹】 王冠之心
白雪公主不多，認命扮矮人的有太多個⋯⋯
做慣七友嘅你，係時候要反轉命運啦！
古語有云「有得揀，先係老闆」，今次呢副王冠之心，七位公主，比你任揀⋯⋯黎支持佢上位做女帝。喺云云日式牌組建構遊戲，王冠之心可謂當中表表者，先唔講卡面靚咁膚淺，公主真係設計得好靚！而家終於出左中文化，你唔係唔玩下嘛！
各玩家身為一個窮領主，藉著不斷榨壓平民，將自己領地、軍力擴展後，又再榨壓埋中產，榨榨榨，一路榨到你有6金，三塊地之後，就可以進入遊戲最重要嘅一步：揀公主。
各位公主雖然高貴，但你仲勁，你有得揀！各位公主有不同屈機技能，隨遊戲進程，將技能使用得宜，會成為致勝關鍵。
但要上位，點止要錢，仲要有勢，當有錢之後就要開始不停收買公爵，得到繼承點，儲夠20繼承點，就可以宣告幫公主加冕，一輪過後如果無另一位公主有20繼承點，則完成加冕，成功扶植傀儡公主登位......
一副遊戲比你由頭到尾，體驗帝制嘅殘酷，唔，真係一副好遊戲啊。
