桌遊介紹 | Bunny Kingdom
狡兔唔洗三窟嘅，最緊要識揀手牌！
為各位介紹近期大熱嘅一副桌遊「Bunny Kingdom」，睇落啲兔仔Meebo 好得意，張地圖又的的骰骰，應該都會好輕鬆﹑好歡樂。但其實殊不知兔仔之間嘅戰爭係好殘酷㗎…
呢隻Game 入面各位玩家會帶領各自嘅兔子兵團係一塊10x10 嘅地圖上面互相爭奪領土﹑資源、建設大兔子帝國，並於有限回合內生產出最多金色蘿蔔(分數)為勝。
遊戲精髓就在於每輪嘅輪抽階段，一開始各個玩家會有10-12張手牌(視乎玩家人數)，並從中選擇其中2張使用，然後將剩下手牌傳比下一位玩家，再選再傳，直到所有手牌用盡。因此每次玩家可以揀對自己最有利嘅手牌，亦可以keep對手牌令對手領地打開缺口！
手牌內除咗有領地牌(讓玩家永久佔領該土地)、 營地牌(讓玩家暫借土地)、城堡牌(讓玩家可以建設城堡)，仲有各式各樣可以令玩家係最後結算一擊翻盤嘅羊皮卷軸！
雖然羊皮卷軸只會在最後一輪結算，但當中效果十分強大，能給予玩家大量分數！所以，玩家必須時刻回顧已選嘅羊皮卷軸，因為會影響你往後嘅策略。
呢隻遊戲可以玩嘅策略好多，就算領地被對手𠝹開、資源被壟斷，遊戲總有方法令你釜底抽薪，一下反擊！一齊黎試玩下，建設最強大嘅大兔子帝國啦！
