桌遊介紹 | Bloodborne: The Card Game - 血源詛咒
相信Bloodborne依個名如果有打開機嘅你都一定知咩黎，但係如果我話你知原來佢都有出一隻Board Game嘅話咁你又知唔知玩乜呢？
喺依隻Board Game 入面玩家會擔當獵人，為得到血之迴響(即係錢)而疲於奔命。遊戲可供二至五人參加，玩家需要合作對付接踵而來嘅怪物，直至到達最終大佬並將佢殺死為止。依個遊戲入面所有小怪都會喺一回合後逃走，但係小BOSS同FINAL BOSS 不單止唔會逃走，相反佢會留喺場上繼續追住玩家打，直至有玩家將佢殺死！
戰鬥時，每個玩家會同時面朝下打出一張卡，你嘅同伴有可能會打出攻擊牌合力消耗怪物血量亦有可能係打出獵人夢境卡自私逃走！計算傷害嘅時候會由部份擁有先攻能力既武器或道具先行攻擊怪物，如果怪物仲未死就會攻擊獵人。獵人根據怪物嘅危險度擲骰，不幸擲到帶有”X”符號嘅骰面果陣，即喺代表怪物使用連續攻擊！獵人需要不停受到傷害直到擲到沒有”X”符號的骰面。此時如果仲有未死嘅獵人，就會由近戰武器展開攻擊。如怪物成功被擊殺，所有參與戰鬥的獵人會得到獎盃及造成怪物傷害相應的血之迴響。
戰鬥後就會輪到打出獵人夢境卡或者死亡的獵人在獵人夢境中選擇升級、存入血之迴響、補血及取回所有用過嘅行動卡。遊戲會喺FINAL BOSS死亡時完結，最後擁有最多血之迴響嘅玩家成為唯一嬴家！
遊戲雖然採用合作模式打怪，但係最終只會有一個贏家，加上大部份出現嘅怪物都十分強大，用燃燒彈、鎗喺後面執尾刀，仲有逃走入獵人夢境等，各種坑隊友場面會時常出現！如果想玩可以搞局或者鐘意整人嘅遊戲，依隻合作(?)遊戲相信都會令你滿意。
通常呢類賣Theme 嘅桌遊都只會係掛羊頭賣狗肉，玩落感覺上都只會係普普通通，似曾相識嘅某某遊戲，再求其換塊皮就算，完全冇果套作品嘅感覺。但依副Bloodborne: The Card Game 點講都好，有一點一定好有Bloodborne 感覺嘅位就係，不斷死然後入獵人夢境再黎過…
#高度推薦 https://www.youtube.com/watch?v=kkMXPGwA7gs
Farewell good hunter, may you find your worth in the waking world.
