棋間限定日本桌遊介紹 | Blade Rondo
2018年Game Market上一出旋即掀起話題，從畫風到系統都被喻為係散櫻亂舞嘅挑戰者，而呢副就係今日要介紹嘅 Blade Rondo。Blade Rondo 都係一副2人對戰嘅Card Draft 遊戲，大家最關注嘅(?)女神則會化成7支寶劍為各位戰鬥。
如果要以格鬥遊戲黎比較，散櫻好似街霸一樣，每一下操作要熟練度高，要知必殺技嘅入力方法，先可以組織到combo，玩到策略。而Blade Rondo就好似任天堂大亂鬥咁，只要簡單理解遊戲，就已經可以輕鬆感受到爽快嘅策略，拳拳到肉嘅打擊感。
舉個例子，散櫻有時要計距離，計氣等等，當然可以令策略度大增，但對於新手而言，未免有點難入手。
Blade Rondo 以加護法作為防禦對方的手段，玩家要在使用魔力增加防禦 或是 使用魔力增加攻擊力間作出抉擇。簡單的選擇，但運用時機決定一切。
再講畫風，出版Blade Rondo嘅風栄社以奇幻、唯美嘅畫風見稱，前作Miraris個封面真係靚到叔叔不行鳥嘅同時，Blade Rondo以更完美，更華麗嘅風格呈現係每一張，係 每 一 張 卡 上面。雖然Blade Rondo 係由幾位畫師共同協作而成，但畫風不但無炒晒車(望向Startlight Stage www)，反而更顯得和而不同，為各種武器展示不同嘅風格。(之後，我會再為各位介紹畫師同卡片之間嘅趣聞，請繼續留意！)
Blade Rondo雖然每一張卡都有日文，但其實複雜程度不是很高，玩過幾盤之後大部份玩家都可以輕鬆掌握到所有卡牌。而且稍後我地亦會作出第1次嘗試，為各位翻譯Rulebook，敬請期待！
總括而言，Blade Rondo 爽快度高，而且開局速度快，一盤大慨10至20分鐘左右，而且一盒已足夠2人對戰，所以相當輕便。雖然在卡牌的功能上，多玩幾次會發現卡牌重覆性高，但不同卡片嘅配搭會令遊戲進程有不同變化，而且我相信官方應該會再出Expansion等令戰局更多變化！
為左召集更多玩Blade Rondo嘅朋友仔，我地已經開左 Blade Rondo 嘅資訊交流約戰區，歡迎加入成為Blade Rondo 支持者！
